قصيدة حلم عصافير.................

غنوة : حلم عصافير



احلم انه وياج
عصفورين وبعش من خيال
وخُبزه سمره بلون خدِّج
وشحلاة الخبزه لو جانت حلال
وجاي اسود مثل رمشج
اصفه من عين الغزال
*
وعسل معجون بغَزَل
رضعان وشويَّة خجل
والعين بالعين وزجل
تزَعِّليني وانه ازعلج
وابقه اتوسل بحسنج
ومن تراضيني بَّسمتج
ارضه والباقي انتِ سِيد العارفين!



وانت فوك ايدي بجفن غافي تنامين
اهمس بإذنج عوافي ياحبَيبَه شتحلمين؟
وارسم بلون البنفسج بوسه مابين العيون
*
والانفاس اشتمهه عنبر
وبرتقال الوجن الاسمر
نخلي كل عصفور يسهر
احنه بس اثنينَّه اللي نايمين



ولو تعبنه وهاي دنيه مودرب مفروش فُل وياسَمين
يوم دمعه ويوم بسمه يحضِنِج كلبي واحس بيه تنبضين
اليِوَدنه اهلاً وسهلاً على ربنه شما يجي متوكلين
*
مايزعلنه اذا جناحينَّه الريح كسَرَتهه
وشمعة البيناتنه الغيره طفَتهه
هذي غيمه وتنجلي ونعرف طبعهه
واحنه هيجي وهيجي بُكره مسافرين!